ازاي نخطط لسنة 2020
كتير مننا يضع اهداف في بداية كل سنة و بيكون عندنا حافز كبير اننا نحقق اهدافنا و بعد اول اسبوعين او شهر كل الاهداف دي بتختفي و بنرجع نعيش حياتنا و بنكتشف اننا مححقناش اي حاجة من الاهداف دي في المقال دة حقولكم خطوات ساعدتني اني احقق اهدافي و بطريقة بسيطة علشان سنة 2020 تبقي مختلفة بس مطلوب منكم ورقة و قلم علشان تاخدوا ملاحظات و يارب افديكم
تحديد الوضع الحالي:
اول خطوة لازم تعرفي انتي واقفة فين ⸮ مثلا انا عايزة تبقي حياتي صحية اكتر و انقص 20 كيلو من وزني او عايزة اكتسب مهارة معينة او ادرس لغة جديدة ......
تحديد حتحسني اية و بمقدار اد اية :
و في الخطوة دي كلنا بنقع في فخ اسمة الحماس الزائد و حنكرر دي تاني "الحماس الزائد" لية بقول كدة⸮ لاننا بمجرد ما قررنا نكتب اهدافنا علي ورقة بنكون متحفزين جدا و نحط امال و اهدافنا بتكون كبيرة زي مثلا حتعلم 3 لغات او حقرا 50 كتاب و في الحقيقة احنا مش طول الوقت متحفزين و بعد شوية وقت الموضوع حيكون صعب و علشان منقعش في فخ الحماس الزايد الحل في الخطوة الجاية
الاهداف صغيرة قدر الامكان :
الاهداف صغيرة قدر الامكان متلا انا حقرا صفحة و نص "بس " كل يوم انا عارفة اني ممكن يكون هدف سخيف او تافهة بس دة المقصود انا عايزة هدفك يكون صغير لدرجة انك متكسليش و ممكن في بعض الايام الكتاب يشدك و تقراي اكتر و دة طبعا حلو جدا بس دايما افتكري انك مطلوب منك صفحة و نص "بس"
تقسيم الاهداف علي مدار السنة:
مش منطقي انك تتحولي من شخص غير صحي و مش بيلعب رياضة و لابيقرا و لابيتعلم مهارة او لغة جديدة و نصحي من النوم نقرر نعمل كل حاجة و لو التزمتي اسبوع او اتنين صعب تكملي لاني ده حيمثل عليكي ضغط كبيييير علشان كدة انتي ممكن تقسمي اهدافك بالشهر مثلا شهر يناير للصحة مثلا مش حشرب مشروبات غازية او حبطل سكر شهر فبراير حمشي 20 دقيقة و لو لاقتي ان الهدف سهل ممكن تدخلي هدف تاني زي مثلا 5 دقايق قراءة ....... البساطة احلي حاجة و افتكري دايما انجاز صغير كل يوم احسن من اننا منحققش اي حاجة
اجبار و الزام النفس علي الاستمرار :
طيب انا ازاي حلزم نفسي اني كل يوم احقق انجاز صغير خصوصا اننا في الاول بننسي او بنتناسي في حلول كتير جدا زي google keep و دة متوافر علي play store حتعملي كل يوم to do list و حتكون فيها الهدف اللي انتي عايزة تحققية اول حاجة و كدة حيبقي فية حاجة بتفكرك كل يوم انك تعملي المهمة اللي عليكي
لازم تكافي نفسك بالانجاز و تكوين نظام ثواب و عقاب :
لو انتي التزامتي اسبوع كامل انك ماشية علي هدفك يبقي لازم تكافي نفسك بحاجة انتي بتحبيها مثلا لو التزامتي بالنظام الصحي يبقي خدي يوم و كل فية اللي بتحبية
اما بالنسبة لنظام العقاب لما متلتزميش امنعي نفسك من اللي بتحبية
في اخر كلامي احب اقولكم quote
"If it is important to you , you will find away . If not , you will find an excuse."
Ryan Blair.
"لو هدفك مهم بالنسبالك حتلاقي طريقة و لو مش مهم حتلاقي عزر"
و في نهاية موضوعنا اتمني اكون افدكم و تكون سنة 2020 سنة كلها سلام و حب و تحقيق احلامنا و اهدافنا كلنا 💓💓💓
تعليقات
إرسال تعليق